Sæmund Helde er nyaste eksportartikkel frå øya Runde på Sunnmøre, tidlegare kjent for lundefugl og det nederlandske skipsvraket Akerendam. Med si særeigne røyst syng han både eigene songar og lokale folketonar medan han klimprar litt på gitaren. Den kjem han neppe til å byta vekk for verken fele eller fe! Han dristar seg også frampå med både munnspel og plystring. Sæmund er lidenskapeleg oppteken av språk, og i tillegg til si vakre sunnmørsdialekt syng han òg på normert nynorsk, riksmål og færøysk. Saman med eigenkomponerte viser og folketonar har han og sett melodi til kjære dikt frå blant anna Olav H. Hauge, Marie Takvam og Jon Fosse. 27-åringen bur i Bergen og har det siste året hatt ei rekke opptredenar på ulike scener i byen, og har i 2026 samla inn eit flott ensemble for å spela inn songane sine på plate.